Əmək və əhalinin sosial müdafiəsi naziri Sahil Babayev bir qrup qazinin narazılıq etməsinə münasibət bildirib.

APA-nın məlumatına görə, nazir bu barədə jurnalistlərə açıqlamasında bildirib ki, şəhid ailələrinə, müharibə əlillərinə və müharibə iştirakçılarına dövlət dəstəyi nazirliyin fəaliyyətinin ana istiqamətidir:

"Təsadüfi deyil ki, Ali Baş Komandanımızın rəhbərliyi ilə Azərbaycan ordusu qəhrəmancasına 44 günlük müharibə ilə öz ərazisini işğaldan azad etdikdən sonra qəbul edilən əksər qərarlar məhz şəhid ailələrinin, müharibə əlillərinin və müharibə iştirakçılarının sosial rifahının yaxşılaşdırılmasına yönəldilib. Birincisi, onlara ödənilən müavinət, təqaüd və pensiyaların həcmi ciddi şəkildə artırılıb. Bu, 60 faizdən çoxdur. İkincisi onların böyük əksəriyyətinə proaktiv qaydada ödənişlər təyin edilib. Dövlət Sosial Müdafiə Fondunun, Dövlət Məşğulluq Agentliyinin nümayəndələri bir çoxlarının evlərini ziyarət edərək, imkanlarını qiymətləndirib, onlara sosial ödənişlər və məşğulluqla bağlı xidmətlər göstərilib. Dövlət Tibbi Ekspertiza Komissiyasının həkimləri 6 mindən çox qazimizi xəstxanalarda, ebvlərində ziyarət edərək, onların tibbi vəziyyətlərini qiymətləndiriblər".

Nazir onu da qeyd edib ki, bunun nəticəsində ötən il yarımlıq dövrdə 103 min müharibə iştirakçısı, müharibə əlili, şəhid ailəsinə 190 min xidmət göstərilib.

"Orta hesabla hər ay 10 mindən çox xidmət göstərilib. Onların sosial ödənişləri təmin edilib. Onların sosial ödənişləri digər kateqoriyalarda olanlardan təqribən 2 dəfə çoxdur. Onların 6 minə yaxınıözünəməşğulluq proqramına cəlb edilib, 5 mindən çoxu işə düzəlib, 3500-ü mənzillə təmin edilib. Proqramların hamısı davam edir. Dövlətin qayğısı, dəstəyi genişdir və geniş şəkildə də davam edəcək".