Bu gün səhər saatlarında ABŞ ordusunun İranın Bəndər-Abbas hava limanının yaxınlığına hücumundan sonra ABŞ-a məxsus hava bazası hədəf alınıb.

APA-nın Tehran bürosunun məlumatına görə, bu barədə İran İslam İnqilabı Keşikçiləri Korpusu (SEPAH) məlumat yayıb.

Məlumatda qeyd olunub ki, hücumun edildiyi hərbi baza atəşə tutulub.

Qeyd edilib ki, bu cavab ABŞ-a ciddi xəbərdarlıqdır və təcavüzün cavabsız qalmayacağını göstərir.

Bildirilib ki, hücum təkrarlanarsa, İranın cavabı daha qəti olacaq.

SEPAH vurğulayıb ki, bütün məsuliyyət ABŞ-ın üzərindədir.

"Tasnim” agentliyi isə hərbi mənbəyə istinadən bir neçə saat əvvəl ABŞ-a məxsus bir tankerin Hörmüz boğazından radar sistemini söndürərək keçməyə cəhd etdiyini, lakin SEPAH-ın Hərbi Dəniz Qüvvələrinin sürətli və qəti müdaxiləsi və atəşi nəticəsində dayanaraq geriyə qayıtmağa məcbur olduğu haqda məlumat yayıb.

Mənbənin sözlərinə görə, ABŞ ordusu Bəndər-Abbas ətrafındakı boş sahəyə atəş açıb və eşidilən partlayış səsləri həmin hadisə ilə bağlı olub. Bildirilib ki, atəş nəticəsində insan tələfatı və maddi ziyan qeydə alınmayıb.

“Tasnim” əlavə edib ki, hərbi mənbələrdən əldə olunan məlumatlara görə, bu gün səhər Bəndər-Abbasda baş verən hadisələr zamanı dörd gəminin Hörmüz boğazından icazəsiz keçməyə cəhd etdiyi, lakin İranın Hərbi Dəniz Qüvvələrinin xəbərdarlıq atəşindən sonra dayanaraq geri qayıtdığı müəyyən olunub.