Mərkəzi Bankın sədri Elman Rüstəmov haqda yeni məlumatlar yayılıb.
Vertikal.az gundelik-baku.com-a istinadən xəbər verir ki, baş bankir özü üçün geniş imkanlar yaradıb.
"Planet" şadlıq sarayının, "Subaru", "Bakı İnvest Holdinq"in, "Bakı Sığorta", "Səba broyler", "Honda", "Mitsubishi", "Bakı taksi" və "Bank Respublika"nın onun biznes şəbəkəsinə daxil olması haqda kifayət qədər ciddi faktlar ortaya qoyulub.
Onun tikinti bazarında da böyük payının olduğu bildirilir.
Xüsusən köhnə "Şüşəli Bazar" ətrafında tikilən kooperativ evlər və Səudiyyə Ərəbistanının səfirliyinə kirayə verilmiş malikanənin Rüstəmova aid olduğu bildirilir.
"Planet" şadlıq sarayının ətrafında aparılan "yaşıl soyqırımı" isə davam edir. Ağacların kəsilməsinə son qoyulmayıb və qanunsuz tikinti işləri davam etdirilir. Həmin ərazinin Mərkəzi Bankın İdarə Heyətinin sədri tərəfindən zəbt edildiyi deyilir.
Bir neçə gün əvvəl yüzlərlə ağacın olduğu ərazi daş hasara çəkilib. Bundan sonra ağacları kəsməyə başlayıblar.
Şikayətçilər deyirlər ki, tikinti aparılan yerdə dövlət əhəmiyyətli obyekt olmayıb: “Belə deyib camaatın etiraz etməsinin qarşısını alırlar. Şadlıq evinin bir addımlığında nə vaxtdan dövlət əhəmiyyətli obyekt tikilib?
Burda hansısa dövlət idarə və müəssisəsinin inzibati binası tikilsəydi, məlumat lövhəsi qoyulardı. Elman Rüstəmov yenidən bank sədri seçiləndən sonra ağacların məhvi daha da sürətləndirilib.
Cənab prezident bir neçə gün əvvəl qanunsuz tikililərlə bağlı danışdı. Qeyd etdi ki, ağacları kəsib yerində villa, ticarət obyekti tikmək olmaz. Tikənlər layiqli formada cəzalarını alacaqlar. Məgər, Mərkəzi Bankın rəhbəri bunları eşitmədi?".
Tikinti işlərinə Talıb adlı şəxs rəhbərlik edir. O həm də "Planet" şadlıq sarayının müdiridir.
Elman Rüstəmovun yaxın qohumudur, hətta bəzi mənbələr onların qardaş olduğunu söyləyir. Prezident ağacların kəsilməsinə qarşı mübarizə aparır, amma sözügedən məmur yaşıllıqların məhvinə zəmin yaradır.
Qeyd edək ki, Elman Rüstəmov vəzifədə ən çox oturan məmurlardan biridir. Əslən Cəbrayıl rayonundan olan ölkənin baş bankiri 1995-ci ildə prezidentin sərəncamı ilə ilk dəfə Azərbaycan Respublikası Milli Bankının İdarə Heyətinin sədri vəzifəsinə təyin edilib.
Bu il onun səlahiyyət müddəti növbəti dəfə artırıldı. Bu isə o deməkdir ki, qarşıdakı 5 il ərzində ölkə büdcəsinin formalaşmasına nəzarət edən şəxslərdən biri də Mərkəzi Bankın rəhbəri olacaq.
Xatırladaq ki, Rüstəmovun adının qarışdığı manat cinayəti böyük səs-küy yaratmışdı. Bloomberg agentliyinin verdiyi xəbərdən məlum olur ki, Avstriyanın Mərkəzi Bankı Azərbaycan və Suriyadan valyuta çapı üçün sifarişlər alıb.
Razılaşmaya görə, Avstriya bankı həmin ölkələrin milli valyutasını dəyərindən 20 faiz baha çap edib və həmin artıq 20 faiz pul, yəni 19 milyon dollar sifarişçilərin özlərinə - yəni, Azərbaycan və Suriya rəsmilərinə qaytarıb.
Eyni zamanda, Avstriya Mərkəzi Bankının pulların çapı ilə məşğul olan bölməsinin keçmiş rəsmisi də Azərbaycan rəsmilərinə pul verdiklərini etiraf edib. 2011-ci ildə auditorlar Azərbaycan və Suriya pullarının çapı üçün müqavilələrdə hansısa xidmət haqqı kimi offşor şirkətlərə külli miqdarda pul ödəndiyindən şübhələniblər və ilkin yoxlamalarda 4 nəfər saxlanılıb.
Sonradan daha 5 nəfər sorğuya cəlb edilib. Bir neçə ildir davam edən istintaq bu yaxınlarda yekunlaşıb. Banknot çapına görə ödənilən artıq məbləğin geri qaytarılmasının bir hissəsi Panamada qeydiyyatdan keçən "Venkoy" şirkətinin vasitəsilə həyata keçirilib.
Aradan bir müddət keçəndən sonra Mərkəzi Bankın rəhbəri bu qalmaqaldan təmiz çıxmağı bacardı. Birdən-birə 19 milyon dollarlıq qalmaqalın üstündən xətt çəkildi. Hansı ki, bu pullar dövlət büdcəsinin vəsaiti olub.
