Ermənistanda yeni parlament formalaşandan sonra jurnalistlərin qanunverici orqanın binasında fəaliyyəti üçün bir sıra məhdudiyyətlər və sərt qaydalar tətbiq olunub. Artıq yerli saytlarda parlament rəhbərliyinin media üçün qoyduğu yeni məhdudiyyətlərə görə, tənqidi yazılar da dərc olunur. Azvision.az xəbər verir ki, mövzu ilə bağlı "Hraparak"ın məqaləsi daha çox diqqət çəkib.

"Sentyabr ayından etibarən rəhbərlik parlamentin girişində jurnalistlər üçün ayrıca bir otağın yaradılmasını planlaşdırır. Bu da media nümayəndələrinin parlament binası daxilində sərbəst hərəkət edə və istədikləri adamla müsahibə apara bilməməsinə hesablanıb. Bundan əlavə parlamentdə yeni təhlükəsizlik tədbirləri də nəzərdə tutulur. Xüsusən də salonun giriş foyesi hər iki tərəfdən şüşələrlə örtüləcək, xsusi keçid məntəqələri quraşdırılacaq. Deputatlara məhz bu qorunan ərazilərdən zala daxil olmaları üçün çipli buraxılış kartları paylanacaq.

Bütün bu fövqəladə tədbirlərin izahına gəlincə, hakimiyyət daxilində belə bir şaiyə dolaşır ki, Milli Təhlükəsizlik Xidmətinə baş nazir Nikol Paşinyana qarşı terror aktının hazırlanması barədə məlumat daxil olub . Parlamentdə belə sərt təhlükəsizlik tədbirlərinin həyata keçirilməsi isə terror riskinin qarşısını almaq məqsədi daşıyır",-"Hraparak" yazıb.