Salyanın ictra başçısının saysız mülkləri Yardımlıdan Bakıya, Bakıdan Ağcabədiyə qədər uzanır...
Günümüzün reallıqlarından biri də hazırda bir sıra mühüm dövlət postlarına keçmiş biznesmenlərin təyin olunmasıdır. Elə ölkəmizdə siyasətə və ya dövlət idarəçiliyinə biznesdən gələn kifayət qədər şəxs var ki, onların fəaliyyəti yalnız müsbət dəyərləndirilir.
Amma bir reallıq da var ki, bu həmişə belə olmur. Hər halda bu yazımızın qəhrəmanı olan Salyan rayon İcra Hakimiyyətinin başçısı Sevindik Hətəmovla bağlı sitiuasiya tamamilə fərqlidir. Bununla bağlı cumhuriyyet.az-a daxil olan məlumatlara görə bir vaxtlar daş karxanasının müdiri işləmiş Sevindik Hətəmov icra başçısı təyin olunandan sonra da özünü “karyer müdiri” kimi aparır, bu sahədəki biznesini durmadan genişləndirir, Salyanın problemləri isə “dizə çıxıb”.
Xatırladaq ki, 1997-ci ildən “Güzdək” daş karxanasına direktor vəzifəsinə yiyələnən S.Hətəmov burada özünə əməlli-başlı “gün ağlaya” bilib. “Güzdək” daş karxanasındakı fəaliyyəti artıq ona böyük kapital, hörmət və lazımı dairələrə giriş fürsəti tanıtmışdı. 2005-ci ildə deputat mandatı qazanan S.Hətəmov artıq sıradan biri deyildi. Bir müddət YAP Laçın rayon təşkilatının sədri, daha sonra Prezidenti Administrasiyasında baş məsləhətçi vəzifəsində çalışan Sevindik Hətəmov 2012-ci ilin aprel ayında Yardımlı rayonuna, 4 mart 2016-cı il tarixdə isə Salyana icra başçısı vəzifəsinə təyin olunur və bu günə qədər də həmin vəzifədə çalışır.
Əslən laçınlı olan icra başçısının hansı vəzifələri tutmasından asılı olmayaraq hər zaman “karyer biznesi”nə sadiq qalıb və hazırda da onun bir neçə daş karxanası var. Onu da bildirək ki, Yardımlıda, ardınca Salyanda “hakimi mütləq” olan S.Hətəmovun karxana biznesi problemsiz ötüşməyib. Məsələn bir neçə il öncə Güzdəkdəki karxanasında Abşeronun icra başçısı Zakir Fərəcovun təzyiqi ilə üzləşərək məğlub olan S.Hətəmov daha sonra eyni aqibəti Qaradağın icra başçısı Süleyman Mikayılovla yaşayıb.
Sevindik Hətəmovun qarşısına ölkə başçısı ciddi tapşırıqlar qoyduğu halda, icra başçısı isə öz şəxsi maraqlarının əsirinə çevirilib. O, yaxın qohumu, həmin vaxt “Zamin bank” ASC-nin Gənclik filialının direktoru işləyən Mahir Abbaszadənin Laçın rayonundan millət vəkili seçilməsi üçün milyonlar xərcləyib. Ona görə də M.Abbaszadə də hər zaman onu yuxarı dairələrdə müdafiə edir.
Sevinsik Hətəmov yaxın qohumları üçün də ağ gün ağlayıb. Belə ki, bacısı Nəsilənin əri Fərruxu Bakı şəhərində yerləşən Laçın köçkün məktəbinin direktoru təyin etdirib. Digər bacısının əri Oktay onun Qaradağdakı daş karxanalarını idarə edir. Oktayın oğlu Cəmil Məmmədovu Sumqayıt şəhərində Hərbi Prokurorluğa işə düzəldib .
S.Hətəmov Ağcəbədi rayonu ərazisində Laçın rayonuna aid qış yatağında 250 baş iri-buynuzlu və 1400 baş xırda-buynuzlu heyvandan ibarət böyük bir ferma yaradıb. Həmin heyvandarlıq fermasını qayınatası Cənnət kişinin adına rəsmiləşdirib və hətta həmin ferma üçün Sahibkarlığa Kömək Milli Fondundan xeyli kredit də ayırtdırıb.
Bakıda Həsən Əliyev küçəsində “milyonerlər” məhəlləsində bacısı Lətifənin adına 4 mərtəbəli villa alıb.
Oğlu Xətainin öz şəxsi nüfuzundan və əlaqələrindən istifadə edərək Bakı şəhəri 3 saylı “Asan Xidmət” Mərkəzinə müavin vəzifəsinə təyin etdirib. Qızı Günayı isə Neftçilər xəstəxanasında UZİ aparatı üzrə həkim vəzifəsinə yerləşdirib. Oğlu Xətai və qızı Günay isə dəyəri 150 min dollar son model “Range-Rover” markalı maşınlarla işə gedirlər.
Sevindik Hətəmov Nabranda möhtəşəm bir istirahət mərkəzini yeznəsi Oktayın adına alıb. Bakının mərkəzində S.Hətəmovun 8 yerdə topdansatış mağazalar şəbəkəsi var.
BDU-nun yaxınlığında “Meqa-Siti” yaşayış kompleksində ikisi 4, üçü isə 3 otaqdan ibarət 5 mənzili alıb.
Kompleksdə yerləşən “İdman-sağlamlıq” mərkəzini də bacısı Nəcibənin adına alaraq icarəyə verib. Həmin yaşayış kompleksi ilə üzbəüz gözəllik salonu da Sevindik Hətəmova məxsus obyektlərdən biridir.
Bütün bunlardan əlavə yazmadığımız daha bir çox mülklərə sahib olan icra başçısı barədə daha geniş məqaləni yaxın günlərdə oxucularımıza təqdim edəcəyik.
Xatırladaq ki, həbs olunan icra başçıları da çoxlu obyektlərə və başqalarının adına rəsmiləşdirilmiş bizneslərə sahib idilər. Aktualxeber.az olaraq bildirək ki, bizim bu yazımız yəqin ki, əlaqədar orqanlar və DTX üçün də maraqlı sayıla bilər. Qarşı tərəfi də dinləməyə hazırıq.
pia.az
