Birləşmiş Millətlər Təşkilatının (BMT) ali məhkəmə orqanı olan Beynəlxalq Ədalət Məhkəməsi Azərbaycanın iddiası üzrə Ermənistana qarşı təxirəsalınmaz tədbirlərin görülməsi ilə bağlı müvəqqəti qərar verəcək.
APA-nın məhkəmənin saytına istinadən verdiyi xəbərə görə, qərar dekabrın 7-də elan ediləcək.
Məhkəmənin Prezidenti, hakim Joan E. Donoghue qərarı Haaqadakı Sülh Sarayında, ictimai iclasda elan edəcək.
COVID-19 pandemiyası ilə əlaqədar zalda yalnız məhkəmənin üzvləri və iştirakçılar (Azərbaycan və Ermənistan) dövlətlərin nümayəndələri iştirak edəcəklər.
Diplomatik korpusun üzvləri, media və ictimaiyyət nümayəndələri qərarın elan edilməsini məhkəmənin saytında, eləcə də BMT-nin onlayn televiziya kanalı olan BMT Web TV-də canlı yayım vasitəsilə izləyə biləcəklər.
