"Bayramdan sonra icra başçılarının dəyişdirilməsi prosesi davam edəcək". Bunu Vertikal.Az-a hökumətdəki məlumatlı mənbə xəbər verib.
İddialara görə, dəyişiklik prosesinə başlayar-başlamaz ilk qurbanın kimliyi artıq bəllidir. Vertikal.Az-a deyilənlər: "Hədəfdə 8 ildir ki, Astaraya rəhbərlik edən Qəznəfr Ağayevdir. Keçmiş PA rəhbəri Ramiz Mehdiyevə yaxın fiqur olan Qəzənfər Ağayev bir çox ittihamların hədəfi olub. Hətta o Masallıda icra başçısı olarkən o zamanlar Masallının deputatı olan, hazırda Daşkəsənə başçılıq edən Əhəd Abıyev tərəfindən hətta narkomafiya üzvü olaraq da ittiham hədəfinə çevrilmişdi".
Mənbə iddia edir ki, artıq dəyişiklik qərarı verilib və bayramdan sonrakı dəyişiklik dönəmində Qəzənfər Ağayevin barəsində qərar rəsmən elan olunacaq.
Qeyd edək ki, Qəzənfər Ağayev Astara Rayon İcra Hakimiyyətinin Başçısı
2 noyabr 1961-ci ildə Naxçıvan şəhərində ziyalı ailəsində anadan olub.
1990-ci ildə Azərbaycan Texnologiya İnstitutunu, 2002-ci ildə Azərbaycan İqtisad Universitetini bitirib.
Əmək fəaliyyətinə 1980-cı ildə başlayıb. 1983-1986-cı illərdə Naxçıvan şəhərində Tikinti trestində, 1987-1990-cı illərdə Naxçıvan Şərab Emalı Zavodunda müxtəlif vəzifələrdə, 1994-cü ildən Bakı şəhərində "Xal-xal" kommersiya şirkətinin direktoru vəzifəsində işləyib.
2000-2005-ci illərdə Vergilər Nazirliyi sistemində işləyən Qəzənfər Ağayev 2005-2006-cı illərdə Yardımlı rayon İcra hakimiyyəti başçısının Sosial-iqtisadi məsələlər üzrə müavini, 24 mart 2006-ci ildən 29 sentyabr 2006-cı il tarixə kimi Yardımlı rayon İcra hakimiyyətinin başçısı, 2006-2012-ci illərdə Masallı rayon İcra hakimiyyətinin başçısı vəzifələrində çalışıb.
Azərbaycan Respublikası Prezidentinin 14 aprel 2012-ci il tarixli Sərəncamı ilə Astara rayon İcra hakimiyyətinin başçısı vəzifəsinə təyin olunub.
Ailəlidir, 2 övladı var.
