Xəbər verdiyimiz kimi, Azərbaycan Respublikasının Prezidenti İlham Əliyev incəsənət xadimlərinə səhnə fəaliyyətinə görə Prezident mükafatının verilməsi haqda sərəncam imzalayıb. Mükafat alanlar arasında əməkdar artist Nahidə Orucova da olub. Sevincini SİA ilə bölüşən əməkdar artist bu xəbərin gözlənilməz olduğunu dilə gətirib: “Çox sevinirəm ki, Prezident mükafatı alan incəsənət xadimləri arasında mən də varam. Bu mükafata 2 il bundan öncə də layiq görülmüşdüm. Ancaq keçən il mənə mükafat verilmədiyi üçün düşündüm ki, bəlkə bu il də almaram. Ancaq dostlarım zəng edib Prezident mükafatı aldığımı söyləyəndə, çox sevindim. Buna görə Cənab prezidentimizə təşəkkür edirəm. Bildiyiniz kimi qarşıda bizi məsuliyyətli bir vaxt gözləyir. “Bakı-2015” I Avropa Oyunları zamanı prezidentimizin biz mədəniyyət xadimlərini də unutmaması aktrisa kimi mənə qürur verdi. Hər şeyə görə ölkə başçısına dərin təşəkkür edirəm”.
