Bu gün Ukrayna prezidenti Pyotr Poroşenko Qazaxıstana rəsmi səfərə gedib.
Virtualaz.org saytı xəbər verir ki, radar məlumatları əsasında təyyarə trafikini izləyən FlightRadar online xidməti Poroşenkonun AN-148 təyyarəsi ilə Qara dənizin üzərindən uçduğunu qeydə alıb.
Prezidentin təyyarəsi Krımdan yan ötərək Qara dənizin Türkiyə sahilləri boyu uçub, daha sonra Gürcüstanın hava məkanına daxil olub. Oradan təyyarə Azərbaycanın hava məkanından keçərək Xəzər dənizi üzərindən uçub və Astanada yerə enib.
Poroşenkonun təyyarəsinin uçuşu üçün bu cür mürəkkəb marşrutun seçilməsi Rusiya ilə kəskin münasibətlər və qarşılıqlı olaraq hava reyslərinə qadağa qoyulması ilə bağlıdır.
Poroşenko Astanaya enən kimi Qazaxıstan baş naziri Kərim Məsimovla görüşüb. Onun prezident Nazarbayevlə görüşü sabaha planlaşdırılıb.
