Dünyaca məşhur kino ulduzu və Aykido döyüş növü üzrə yeddinci Dan qara kəmər ustası Steven Seqal Bakıdadır. Hollivud ulduzu Bakıda Prezident İlham Əliyevlə görüşüb.
Publika.az xəbər verir ki, Prezident İlham Əliyev ona Azərbaycanda işləmək və yüksək dərəcəli idmançılar yetişdirməyi təklif edib.
Prezidentin şəxsi təşəbbüsü ilə Azərbaycana gələn döyüş ustası bu barədə idmançılarımızla görüş zamanı bildirib. Steven Seqal Azərbaycanda ustad dərslərinin verilməsi ilə bağlı təkliflə razılaşdığını, eyni zamanda bu əməkdaşlığın yüksək nəticə verəcəyinə əmin olduğunu deyib.
Görüş “Bakı Kristal Holl”-da baş tutub. Azərbaycan Aykido Federasiyasının bütün regional şöbələri baş tutan görüşdə məhdud sayda nümayəndə heyəti ilə iştirak edib. Yerli Aykido ustaları və onların şagirdləri ilə birgə tatami üzərinə çıxan Hollivud əfsanəsi ustad dərsi keçib. O, idmançılarımızın hazırlıq səviyyəsini də qiymətləndirib.
Seqal idmançılarımızla söhbət zamanı bildirib ki, bundan sonra onun Bakıya mütəmadi səfərləri olacaq. Görüşün sonunda Steven Seaqal hətta növbəti səfərinin noyabr ayında olacağını da vurğulayıb.
