Xəbər verdiyimiz kimi, hakim Yeni Azərbaycan Partiyasının namizədliyindən imtina etdiyi deputatlardan biri də Kürdəmirdən seçilmiş deputat Fərhad Qəribovdur.
“Qafqazinfo” xəbər verir, F. Qəribov bir neçə gün əvvəl saytımıza açıqlamasında YAP-ın onunla bağlı qərarını dəstəklədiyini vurğulamışdı. Maraqlıdır ki, hakim partiyanın həmin dairədən irəli sürdüyü namizədinin soyadı da Qəribovdur.
“Qafqazinfo” bu məqama aydınlıq gətirmək üçün millət vəkili Fərhad Qəribovla əlaqə saxlayıb. Deputatdan yeni namizəd Nizami Qəribovla qohumluq əlaqələrinin olub-olmadığını soruşub. Deputat N. Qəribovla uzaq qohumluq əlaqələrinin olduğunu deyib: ”Bizim babalarımız qohum olublar. Yaxın qohumluq əlaqələrimiz yoxdur”.
Seçki prosesində öz qohumunu dəstəkləyib dəstəkləməməsi məsələsinə gəlincə isə, millət vəkili bildirib ki, o Kürdəmir rayonunda qeydiyyatda deyil: “Qeydiyyatda olduğum ərazidə YAP-ın namizədini dəstəkləyəcəm”.
Deputat həmçinin əlavə edib ki, öz nüfuzunu heç kimə xərcləmək niyyətində deyil: “Nüfuzumu özümə saxlayıram. Lazım olanda özüm üçün istifadə edəcəm”.
