Bu barədə Hafta.az-a açıqlamasında MSK-nın mətbuat xidmətinin rəhbəri Şahin Əsədli deyib. Mərkəzi Seçki Komissiyasının sözçüsünün bildirdiyinə görə iclasın əsas mövzusu V çağırış parlament seçkilərinə hazırlıq məsələləri olacaq:
"Sentyabrın 8-də Mərkəzi seçki Komissiyası Məzahir Pənovun sədrliyi ilə növbəti dəfə toplanacaq. Toplantı sabah saat 16:00 – da başlayacaq".
Şahin Əsədli ötən iclasın əsas məqamlarından da danışıb:
“Ötən iclasda Milli Məclisə seçkilərdə birgə iştirak etmək məqsədilə Aydınlar Partiyası, Azadlıq Partiyası, Azərbaycan Xalq partiyası, Azərbaycan Liberal Demokrat Partiyası, Böyük Azərbaycan Partiyası, Klassik Xalq Cəbhəsi Partiyası və Vətəndaş və İnkişaf Partiyası tərəfindən yaradılmış "AZADLIQ-2015” siyasi partiyalar bloku Komissiya üzvlərinin müzakirəsindən sonra MSK-nın qərarı ilə qeydə alındı və blokun emblemi təsdiq edildi. Həmçinin İclasda bəzi seçki dairələri dairə seçki komissiyalarının tərkibində dəyişikliklər edildi. Beynəlxalq qurumların və kütləvi informasiya vasitələrinin nümayəndələrinin iştirak etdiyi iclasda cari məsələlərə də baxıldı”.
