Avstriyanın “NCA Container- und Anlagenbau” şirkəti Azərbaycanda həyata keçirdiyi iri layihədə ziyana düşdüyünə görə müflis olub.
Virtualaz.org saytı xəbər verir ki, şirkət iyulun 27-də müflisləşmə prosedurunu başladıb.
Şirkətin icraçı direktoru Piter Ştyurmer bildirib ki, onların müflis olmasının səbəbi son illər keçmiş baş direktor tərəfindən yol verilən bəzi nöqsanlar, konkret olaraq Azərbaycanda həyata keçirilən iri layihədə “fövqəladə neqativ tendensiyalar”dır.
İcraçı direktor şirkətin 9 milyon avro borcunun yarandığını və ödəmə qabiliyyətini itirdiyini, bu səbəbdən müflisləşmə prosedurunu başlatdıqlarını bildirib.
Piter Ştyurmer Azərbaycandakı hansı iri layihədən söhbət getdiyini açıqlamayıb. İcraçı direktor deyib ki, yaxın vaxtlarda onlar iş yerlərini saxlamaq üçün yeni investor axtarıb tapmağa çalışacaqlar.
“NCA Container- und Anlagenbau” şirkəti polad, paslanmayan polad və alüminiumdan metal konstruksiyaların istehsalı ilə məşğul olur. Bu konstruksiyalar müxtəlif tikililərdə - ticarət mərkəzlərində, pavilyon tipli sənaye sexlərində, rezervuarlarda, farmasevtika sahəsində, konsert salonlarında və stadionlarda istifadə oluna bilər.
Şirkət Azərbaycan bazarına bir neçə il əvvəl çıxıb. Keçmiş baş direktor Kristian Şrammelin vaxtında “NCA Container- und Anlagenbau” şirkəti Azərbaycandan iki iri sifariş alıb. Bunlardan biri “Baku Crystal Hall”un tikintisində istifadə olunan metal konstruksiyaların çatdırılması və quraşdırılması, digəri isə Bakıdakı Xalça Muzeyinin tikintisidir.
“Eurovision-2012” mahnı yarışmasının keçirildiyi “Baku Cryistal Hall”un mərkəzi dam örtüyünün, habelə fasad konstruksiyalarının yarısının quraşdırılması bu şirkət tərəfindən həyata keçirilib.
“NCA Container- und Anlagenbau” 1991-ci ildə ailə şirkəti kimi yaradılıb və inkişaf edərək öz sahəsində iri şirkətlərdən birinə çevrilib. Lakin Azərbaycandan aldığı sifarişlərə görə ziyana düşüb və müflis olub. Şirkətin “Baku Crystal Hall” və Xalça Muzeyindən başqa hansı tikinti layihələrində yer aldığı məlum deyil.
