Bakıda kifayət qədər heykəl var. Onların hər biri dahi tarixi şəxsiyyətin, alim, yazıçı və şairin şərəfinə ucaldılan, yəni onlara hörməti ifadə edən abidələrdir.
Təəssüf ki, bu heykəllərin özünə kifayət qədər diqqət ayrılmır. Belə ki, onların yarısı çirklidir, yarısında isə heykəli ucaldılan şəxsiyyətlərin adı pyedestalda hələ də yazıldığı əlifbada - kiril əlifbasında qalır.
Virtualaz.org saytının reportyorunun diqqətini isə çirkli heykəllər daha çox cəlb edib. Məsələn, dahi dramaturq Cəfər Cabbarlının şərəfinə ucaldılmış abidəni quşlar, şəhərin toz-torpağı çirkləndirərək bu məşhur ədibin üzünü görünməz-tanınmaz hala salıb.
Böyük şair Səməd Vurğunun abidəsi də eyni haldadır.
Bakıya gələn turistlər həmin heykəlləri bu vəziyyətdə görəndə nələr düşünəcək deyə özümüzü yormayaq. Cavab bəri başdan aydındır.
Digər tərəfdən isə bu abidələr həm də sənət əsəridir. Çirkli, natəmiz heykəl təkcə həmin şəxsiyyətlərin ruhuna yox, həm də onları yapan heykəltəraşın, memarın zəhmətinə hörmətsizlikdir.
Bəs bu abidələrin təmizliyinin qorunması hansı qurumun nəzarətindədir? Buna kim məsuldur: Mədəniyyət və Turizm Nazirliyi, yoxsa Bakı Şəhər İcra Hakimiyyəti?
Bu sualın cavabından asılı olmayaraq ortada bir həqiqət var: bu abidələr çirklidir və onlar hər halda belə olmamalıdır.
Anlayırıq, heç bir məmur, yaxud məsul dövlət qurumu quşlara, yağışa-küləyə hökm edəcək gücdə deyil. Amma onların batırıb bulaşdırdığını hər həftə də demirik, heç olmasa ayda bir-iki dəfə yuyub təmizləmək olar axı...
