“Könüllülər “Bakı-2015” Birinci Avropa Oyunları zamanı öz öhdələrinə düşən missiyanı layiqincə yerinə yetirdilər. Onlar etməli olduqları işləri yüksək səviyyədə həyata keçirdilər”.
Bunu Modern.az saytına Milli Məclisin deputatı Rauf Əliyev deyib.
O bildirib ki, könüllülər oyunlar zamanı gördükləri işlərlə Azərbaycanın üzünü ağ elədilər:
“Ümumiyyətlə, Birinci Avropa Oyunları çox yüksək səviyyədə keçdi. Oyunların yüksək səviyyədə təşkilində könüllərin rolu danılmazdı. Könüllülər Azərbaycanda yaradılan yeni bir forma idi. Birinci Avropa Oyunları zamanı Azərbaycanda 17 minə yaxın könüllü fəaliyyət göstərirdi. Onların hər biri öz işlərini yüksək səviyyədə gördülər. Həm açılışda, həm bağlanışda, həm də idman yarışlarında peşəkarcasına çox gözəl şəkildə öz işlərini yerinə yetirdilər. Könüllülərin çoxu cavanlar və tələblər idi. Bu da Azərbaycan üçün gələcəyə böyük bir potensial verir.
Könüllülər nəinki idman yarışlarında insanlara və idmançılara köməklik etdilər, hətta onlar öz işləri ilə Azərbaycanın mədəniyyətini, qonaqpərvərliyini hər kəsə nümayiş etdilər. Məsələn, İsveçrədən ölkəmizə gələn fotoqraf mətbuata bəyan elədi ki, Azərbaycandan gedəndən sonra burdakı göllər haqda kitab yazacaq. Bu da onların bir uğurudur.
Hər bir könüllünü təbrik edirəm. Onların işini alqışlayır, əziyyətlərini yüksək qiymətləndirirəm. Könüllülərə dərin minnətdarlığımı bildirirəm ki, bu çətin missiyanı öz boyunlarına götürüb hər şeyi öhdəsindən də yüksək səviyyədə gəldilər. Təşkilat komitəsinə də çox sağol deyirəm ki, könüllərdən ibarət belə bir təşkilat yaradıb.
Gələcəkdə Azərbaycanda müxtəlif dünya və Avropa çempionatları keçiriləcək. Onların hər biri çox önəmli idman tədbirləridir. Həmin idman yarışları könüllülərsiz keçmir.
Ümumiyyətlə, heç bir idman yarışı könüllüsüz keçmir. Bu mümkün olan şey deyil. Artıq onlar formalaşmış təşkilatdır. Oyunlar zamanı, açılış və bağlanış mərasimlərində hamı onların işini hiss elədi. Stadiona daxil olub və çıxana kimi onlar müsbət və pozitiv şəkildə öz işlərini gördülər”.
