Ukraynanın Təhlükəsizlik Xidmətinin əməkdaşları və Dövlət Sərhəd Xidməti Ekvadordan bu ölkəyə kokain gətirilməsini təşkil edən mütəşəkkil cinayətkar qruplaşmanı üzə çıxarıb.
Virtualaz.org saytı Ukrayna KİV-lərinə istinadən xəbər verir ki, transmilli qruplaşmanın üzvləri Latın Amerikası ölkələrinin birindən Kiyevə narkotik maddə daşınmasını təklif ediblər.
Qruplaşmanın tərkibinə Ekvador, Azərbaycan, Moldova və Ukrayna vətəndaşları daxildir.
Xüsusi əməliyyatın birinci mərhələsində Ekvadorun Quayakil aeroportunda Ukraynaya 1,5 kiloqram kokain gətirmək istəyən 2 narkokuryer tutulub. Onlar Ukrayna və Azərbaycan vətəndaşlarıdır.
Əməliyyatın iyun ayında keçirilən ikinci mərhələsində isə Kiyev aeroportunda daha bir narkokuryer yaxalanıb. Həmin şəxs Moldova vətəndaşıdır və Cənubi Amerikadan 0,5 kiloqram kokain gətirirmiş. Qruplaşmanın qalan üzvlərinin yaxalanması üçün əməliyyat davam etdirilir.
