“Birinci Avropa Oyunları ölkəmizin dünyada daha artıq tanınması, Azərbaycan həqiqətlərinin dünyaya yayılması baxımından çox vacib hadisədir”.
Bu sözləri Editor.az-a açıqlamasında Milli Məclisin deputatı Cavanşir Paşazadə söyləyib.
Onun sözlərinə görə, Azərbaycan oyunlara yüksək səviyyədə hazırlaşmaqla, bütün Avropanı heyran qoymağı bacarıb:
“Qısa müddətə Azərbaycan bu oyunlara möhtəşəm səviyyədə hazırlaşdı. Oyunların açılış mərasiminə dünyanın 30-dan artıq dövlət və hökumət başçısı qatıldı. 6 mindən artıq idmançı öz gücünü sınamaq üçün yarışlara qatıldı. Onminlərlə xarici qonaq oyunları izləmək üçün ölkəmizə təşrif buyurdu. İstər oyunların keçirildiyi məkanlar, istərsə də Azərbaycan idmançılarının göstərdiyi yüksək nəticələr dövlətimizin idman ölkəsi olaraq dünyada rolunu artırır. Heç şübhəsiz bu oyunlar ölkəmizin qarşısında geniş imkanlar açmaqla yanaşı, həm də ölkəyə turist axınını gücləndirəcək. Bundan sonra nə qədər Avropa Oyunları keçiriləcəksə, bu oyunlara Azərbaycandan start verildiyi xatırlanacaq. Başqa sözlə desək, Azərbaycan daha bir tarix yazdı, daha bir ilkə imza atdı”.
