28 May - Respublika Günü münasibətilə Azərbaycanın bir sıra siyasi partiyaları bayram tədbirləri keçirməyi planlaşdırır.
Hafta.az partiyaların tədbirlə bağlı planlarını təqdim edir.
Yeni Azərbaycan Partiyasının mətbuat xidmətinin rəhbəri Hüseyn Paşayev bildirib ki, partiyanın rayon təşkilatlarında müxtəlif səpkili tədbirlər keçiriləcək:
“Bütövlükdə icra katibliyinin tədbirləri barəsində məlumat isə iki gün ərzində yayımlanacaq”.
Müsavat Partiyasının məclis üzvü Vəfa Cümşüdlü Hafta.az-a açıqlamasında 28 May planları ilə bağlı aşağıdakıları bildirib:
“Hər il olduğu kimi, bu il də Müsavat Partiyası 28 May - Respublika Gününü qeyd edəcək. Hər bir xalq üçün Respublika Günü ən gözəl və şərəfli bir gündür. Bu günü qeyd etməklə həm də onu bizə bəxş edən insana - Məhəmməd Əmin Rəsulzadəyə və onun silahdaşlarına vəfa borcumuzu vermiş oluruq. Biz 28 May tarixində saat 12:00-da Rəsulzadənin Novxanıda yerləşən büstünü ziyarət edəcəyik”.
AXCP təşkilat komitəsinin sədri Rafiq Daşdəmirov Hafta.az-a açıqlamasında bildirib ki, onlar da Rəsulzadənin büstünü ziyarət etməyi düşünürlər:
“Biz qərara gəlmişik ki, partiya üzvləri ilə birlikdə 28 may tarixində saat 13:00-da Rəsulzadənin büstünü ziyarət edərək, bu bayramı qeyd edək”.
ADP sədri Sərdar Cəlaloğlu isə Hafta.az-a bildirib ki, günlə bağlı Ümid Partiyası ilə birgə qərarları olacaq:
“Lakin bu qərar hələ tam bəlli deyil. 20 may tarixində bu məsələ ilə bağlı toplantı keçirdik. Hələ son qərarı verməmişik. Çox güman ki, ya bu günü partiya daxilində, ya da Qarabağ bloku tərkibində Rəsulzadənin abidəsini ziyarət etməklə qeyd edəcəyik”.
Müasir Müsavat Partiyasının sədri Hafiz Hacıyev isə Hafta.az-a açıqlamasında söyləyib ki, hələ başları qarışıqdır:
“Hacıbala Abutalıbovun mənim haqqımda söylədiyi fikirlərlə bağlı partiya daxilində müxtəlif qərarlar verilməkdədir. Buna görə də hələ başımız qarışıqdır. Lakin 28 May gününü mütləq qeyd edəcəyik. Partiya daxilində toplantı keçirib, bu günlə bağlı müzakirələr, fikirlər söyləyəcəyik. Biz müstəqilliyimizlə bağlı olan tədbirlərin heç birindən geri qalmırıq”.
