“Bu, UEFA-dan asılı olmayan siyasi məsələdir”.
Ermənistana bir günlük qeyri-rəsmi səfər edən UEFA prezidenti Mişel Platini Azərbaycan və Ermənistan arasında münasibəti şərh edib.
Oxu.az bildirir ki, Platini news.am-a deyib: “Futbolda irqçiliyə, eləcə də futbola da təsir göstərən Ermənistan və Azərbaycan arasında münasibətə gəldikdə isə, problemlər bütün dünyada mövcuddur. Biz sadəcə onların həllinə vasitəçilik etmək istəyirik. Bəzi məsələləri həll etmək asandır, bəzilərini çətin. Futbol çərçivəsində mümkün olan hər şeyi etməyə səy göstəririk.
Azərbaycan və Ermənistan arasındakı münasibət UEFA-dan asılı olmayan siyasi məsələdir. Mənim arzum isə hər şeyin yaxşı olmasıdır”.
Səfər zamanı Platini Avan futbol akademiyasına, gənc oyunçuların oyununa baxıb və onlarla şəkil çəkdirib, sonra isə KİV nümayəndələri ilə söhbət edib.
