“Bu ilin sentyabr ayından Azərbaycanın orta məktəblərinin yuxarı siniflərində təmayülləşmə tətbiq olunacaq”. Lent.az-ın məlumatına görə, bu barədə təhsil naziri Mikayıl Cabbarov Heydər Əliyevin anadan olmasının 92-ci ildönümü münasibətilə şagirdlər arasında təşkil olunan inşa yazı müsabiqəsi qaliblərinin mükafatlandırılması mərasimində çıxışında deyib.
Onun sözlərinə görə, təmayülləşmə onlara məktəbdə tətbiq ediləcək. “Hazırda hazırlıq işləri görülür. Bu, istedadlı gənclərə keyfiyyətli təhsilin çatdırılmasında mühüm rol oynayacaq”.
M. Cabbarov deyib ki, bu il Bakının 2 məktəbində ilk dəfə olaraq inklüziv təhsilin tətbiqinə də başlanacaq: “Hazırda on minlərlə fizik qüsurlu uşaq təhsildən kənardadır. Həmin uşaqlar inklüziv təhsillə əhatə olunacaq və onların təhsil hüququ təmin ediləcək”.
Nazirin sözlərinə görə, bu ildən I siniflərə şagirdlərinin qəbulu elektron formada həyata keçirilir: “Bu il “2007-2015-ci illərdə Azərbaycan gənclərinin xaricdə təhsili üzrə dövlət proqramı” başa çatır. Bu dövlət proqramı çərçivəsində 3 184 nəfər xaricdə təhsil almaq üçün dünyanın müxtəlif ölkələrinə göndərilib. Artıq xaricdə təhsillə bağlı yeni dövlət proqramının layihəsi hazırlanaraq hökumətə təqdim edilib. Yeni proqramda bakalavriatdan sonrakı təhsil pilləsinə üstünlük veriləcək. Proqram Azərbaycan gənclərinin xarici ali məktəblərə göndərməklə yanaşı, xarici mütəxəssislərin də ölkəyə gətirilməsini özündə ehtiva edəcək”.
