Məlum olduğu kimi, Azərbaycanda 12-28 iyun aralığında ilk Avropa Oyunları keçiriləcək. Oyunlarda 50 ölkədən 30 idman növü üzrə 6000-dən çox idmançının yarışacağı gözlənilir. Oyunlar öncəsi artıq biletlərin satışına başlanılıb.
Editor.az “Avropa Oyunlarında iştirak edəcəksinizmi? Oyunlara bilet almısınızmı?” sualı ilə millət vəkillərinə müraciət edib.
Millət vəkili, professor Kamilə Əliyeva bildirib ki, Avropa Oyunlarında mütləq iştirak edəcək:
“Əlbəttə, dövlətini, vətənini, millətini sevən bütün vətəndaşlar kimi, biz də Avropa Oyunlarının başlamasını səbirsizliklə gözləyirik. Heç şübhəsiz yarışmalarda iştirak edəcəyik. Öz Azərbaycanımıza və onun idmançılarına dəstək olacağıq”.
Millət vəkili Elton Məmmədov Avropa Oyunlarının aktiv izləyicilərindən olacaq:
“Heç şübhəsiz bu oyunları izləyəcəyik. Bu bizim üçün təkcə idman yarışması olaraq deyil, həm də siyasi baxımdan vacib hadisədir. Ölkəmizin qarşısında geniş imkanlar açacaq bir tədbirdir. Dünyanın müxtəlif ölkələrindən qonaqlar qatılacaq. Minlərlə idmançı mübarizə aparacaq. Hesab edirəm ki, çox maraqlı yarışma olacaq”.
Millət vəkili Zahid Oruc ailəsi ilə birgə Avropa Oyunlarında iştirak edəcək:
“Bu təkcə idman hadisəsi yox, həm də ölkəmizin əldə etdiyi diplomatik uğurdur. Avropa Oyunları dövlətimizin dünya miqyasında daha artıq tanınmasına, o cümlədən ölkəmizin turizm potensialının artmasına səbəb olacaq. Əlbəttə, ailəmizlə birgə Avropa Oyunlarına qatılacaq və yarışları izləyəcəyik”.
Millət vəkili, professor Aslan Şahverdiyev Bakıda keçiriləcək ilk Avropa Oyunlarını tarixi qələbə adlandırır:
“Bu ölkəmizə dünya miqyasında artan marağın, Azərbaycanın beynəlxalq aləmdə nüfuzunun göstəricisidir. Hər bir azərbaycanlı üçün qürur mənbəyidir. Əlbəttə, iştirak edəcəyik. Sözün düzü hələ bilet almamışam, amma mütləq alacam”.
