İran İslam Respublikası Azərbaycanın şəhərlərinə, yaşayış massivlərinə raket hücumlarını və dinc insanların qətlə yetirilməsini pisləyir. Bu barədə İranın Xarici İşlər Nazirliyinin mətbuat katibi Səid Xətibzadə deyib. Onun sözlərinə görə, İran Azərbaycan və Ermənistan arasında elan olunan humanitar atəşkəsin pozulmasından təəssüflənir:
“Beynəlxalq hüquq çərçivəsində danışıqlar başlanmalı, ölkələrin ərazi bütövlüyünə hörmətlə yanaşılmalı və işğal olunmuş ərazilər boşaldılmalıdır”.
Bir neçə gün öncə İran Prezidenti Həsən Ruhani də ölkə başçısı İlham Əliyevə zəng vurub. İran Prezidenti münaqişədən narahatlıq hissi keçirdiyini, tezliklə sülhün bərqərar olacağına ümid etdiyini bildirib. Lakin Ruhaninin və S.Xətibzadənin fikirlərinin qeyri-səmimi olduğu açıq-aydın ortadadır. Çünki istər indi, istərsə də 1990-cı illərin əvvəllərində Dağlıq Qarabağ müharibəsi zamanı işğalçı Ermənistanı yalnız Rusiya və Fransa deyil, İran da silahlandırıb və ya silahlandırır.
Belə bir şəraitdə İranın səmimiyyətinə inanmaq mümkün deyil. Ermənistana dəstək olan Rusiya və Fransanın cinayətkarlığı dəstəkləməsi, faşizm idealogiyasına əsaslanması göz önündədir. İranın xisləti də məhz ikiüzlülükdür. Üzümüzə başqa cür danışıb, ayağımızın altını qazanlardan biri məhz İrandır.
Mövcud proseslər ətrafında Milli Dirçəliş Hərəkatı Partiyasının sədri, sabiq millət vəkili Fərəc Quliyevlə həmsöhbət olduq.
O “Sherg.az”a söylədi ki, İran tərəfi müsəlmanların, islam ümmətinin təəssübkeşi kimi davranır. Lakin bu davranışları heç də səmimi deyil:
"Torpaqlarımızın talanmasında İranın rolunu, silah-sursatın və yanacağın Ermənistana daşınmasını görürük. Bütün bunlar videogörüntülərdə əks olunub. Tovuz hadisələrindən sonra İranın hava məkanından birbaşa Ermənistana hərbi avadanlıq yardımlarının gətirilməsinə icazə verilməsi onu göstərir ki, İran birmənalı şəkildə Ermənistanın yanındadır. Bu gün İran doğurdan da islam hümmətindən danışırsa, gərək konkret addım atsın. Həmin addımları da Türkiyə, Pakistan və Əfqanıstan kimi atmaq lazımdır. Amma heç bir addım atmayıblar. Azərbaycan uzun müddət Ukrayna və Gürcüstandan dəstək aldı. İranın isə sözü ilə əməli üst-üstə düşmür. Bu gün də Ermənistana heç bir sanksiya tətbiq olunmayıb, İran yolları bağlamayıb. Yenə də Ermənistan silah- sursat daşınır”.
F.Quliyev qeyd edib ki, İran bir daha özünü ifşa etdi:
“İran Azərbaycanın bu savaşdan qalib çıxmasına heç vaxt maraqlı olmayıb. Lakin Azərbaycan birtərəfli qaydada problemsiz qonşuluq siyasətin yürüdülməsində maraqlı olub, İrana qarşı ziyanlı addım atmayıb.
Hesab edirəm ki, savaşdan sonra Azərbaycan qonşuluq siyasətin, dostlarının və düşmənlərinin, həmçinin müttəfiqlərinin kim olması barədə yeni bir xəritə yaratmalıdır. Biz xoş münasibət göstərdikcə, İran arxamızca işlər çevirib, düşmənə yardım edəcəksə daha nə oldu? Gəncədə baş verənlərlə bağlı Ermənistana hansı sanksiyanı tətbiq etdilər?
Ümumi şəkildə prosesləri malalayıb, baş qatmaq istəyirlər. Artıq belə şeylər keçmir. Ona görə heç vaxt İranın Azərbaycana qarşı səmimiyyətinə inanmamışam. Onların ucuzlaşmış bir siyasəti var: Quzey Azərbaycan güclü və var olmasın”.
