Məşhur sığorta şirkəti "Azsığorta” ASC məhkəməyə verilib. Vertikal.az qaynarinfo-ya istinadla xəbər verir ki, iddiaçı "Veliev” MMC-dir. İddia Bakı Kommersiya Məhkəməsinin hakimi Leyla Əliyevanın icraatındadır. Açıq mənbələrdə məhkəmə çəkişməsinin səbəbi barədə məlumat yoxdur.
İqtisadiyyat Nazirliyi yanında Dövlət Vergi Xidmətinin reyestr məlumarlarında "Veliev” MMC-nin 2010-cu ildə qeydiyyat keçdiyi göstərilib. Nizamnamə kapitalı 110 AZN olan şirkətin qanuni təmsilçisi Məmmədov Anar Yaşar oğludur.
"Veliev” MMC plastik qapı-pəncərə istehsalı ilə məşğuldur.
"Azsığorta” ASC-yə gəincə, şirkət 2006-ci ildə qeydiyyata alınıb. ASC-nin qanuni təmsilçisi Soltanov Yusif Rəhim oğludur. O, həm də ASC-nin İdarə Heyətinin sədridir.
Mediada gedən və təkzib olunmayana məlumatlara görə, "Azsığorta” ASC-nin səhmlərinin 100 faizi İsmayılov Hikmət Abuzər oğluna məxsusdur. O, Fövqəladə Hallar naziri Kəmaləddin Heydərovun bacanağıdır. Bu baxımdan, "Azsığorta” ASC Kəmaləddin Heydərovun biznes imperiyasının subyekti hesab edilir.
Araşdırmalarımız zamanı o da məlum olub ki, "Veliev” MMC bundan əvvəl də Kəmaləddin Heydərova məxsus olduğu bildirilən "Gilan İnşaat” MMC-ni məhkəməyə verib. Bu çəkişməsinin nəticəsi barədə məlumat yoxdur.
