ABŞ-ın Tennesi ştatının Kolervil şəhərinin sakini yerli hakimiyyət orqanlarını və polisi intihar etmək istəyən ərini öldürdüyünə görə məhkəməyə verib.
Bu barədə “WMC 5” məlumat yayıb.
Hadisə 2019-cu ilin iyunun 3-də baş verib. Devid Houl adlı şəxs silaha əl atıb və özünü öldürəcəyini söyləyib. Onun həyat yoldaşı Elis fövqəladə yardım xidmətinə müraciət edib.
Hadisə yerinə gələn polis əməkdaşı Ostin Uesqspak Deviddən silahını yerə atmasını tələb edib və bir neçə saniyədən sonra ona atəş açıb.
Hadisə nəticəsində ölən Devid Houlun həyat yoldaşı Elis bundan əvvəl ərinin depressiyada olduğunu və dərmanlarını qəbul etmədiyi üçün psixi problemlərinin yarandığını qeyd edib. Elisin vəkilinin sözlərinə görə, qadın yoldaşı ilə bağlı müvafiq qurumlara zəng edərkən, öz həyatı üçün təhlükə olduğunu heç vaxt bildirməyib.
Məhkəmədə çıxış edən müdafiə tərəfinin vəkili Edvard Makkenni isə mərhumun ətrafdakıların həyatı üçün təhlükə təşkil etdiyini və polis əməkdaşının operativ reaksiya göstərməli olduğunu qeyd edib.
