Ukrayna qoşunları rus ordusunun Metelkino və Beloqorovka qəsəbələrini ələ keçirmək cəhdlərini puça çıxarıb.

Musavat.com xarici agentliklərə istinadən xəbər verir ki, bu barədə Ukrayna Müdafiə nazirliyinin sözçüsü Aleksandr Motuzyanik məlumat yayıb.

"Düşmən itki verib və geri çəkilib. Səhər saatlarından etibarən Rusiya ordusu aviasiyanın dəstəyi ilə Severodonetsk şəhərinin mərkəzi hissəsinin yaşayış məntəqələrində hücum əməliyyatları aparır. Hazırda ağır döyüşlər davam edir”, - deyə Motuzyanik bildirib.

Müdafiə nazirliyinin rəsmi nümayəndəsi Baxmut istiqamətində Ukrayna Silahlı Qüvvələrinin Rusiya qoşunlarının hücumlarını uğurla dəf etdiyini vurğulayıb.

Xatırladaq ki, dünən Luqansk vilayətinin qubernatoru Sergey Qayday Severodonetskin qorunması və onun tamamilə azad edilməsi üçün hər cür şans olduğunu xəbər etmişdi. Xəbərlər arasında Ukrayna ordusunun şəhərin bəzi küçələrini geri alması və hətta əsirlər götürməsi ilə bağlı da məlumatlar var.

Musavat.com