Gürcüstanda turizm vergisinin tətbiqi təşəbbüsü irəli sürülüb.

"Report"un yerli bürosu xəbər verir ki, bu təkliflə ölkənin Mehmanxana və Restoranlar Federasiyasının rəhbəri Şalva Alaverdaşvili çıxış edib.

Onun sözlərinə görə, bu, Gürcüstanın turizm sektorunun xilası üçün yeganə vasitədir.

Federasiya rəhbəri hesab edir ki, vergi bir gün üçün 1-2 avrodan çox olmamlıdır: "Hazırda Gürcüstanın turizm sektorunun borcu 4,5 milyard lari (1,30 milyard avro) təşkil edir. Bu məbləğin 3 milyardı (867 milyon avro) hüquqi şəxslər, 1,5 milyardı (433 milyon avro) isə turizm sahəsində çalışan fiziki şəxslərin payına düşür. 2021-ci ilin yanvarına qədər heç kəs bu məbləği ödəyə bilməyəcək".

Ş.Alaverdaşvili deyib ki, turist Tbilisidə orta hesabla 3,5-4 gün qalır: "Əgər bir ildə şəhərə 2 milyon turist gəlsə, il ərzində vergi hesabına 7 milyon avronu asanlıqla toplamaq olar".

O əlavə edib ki, müvafiq qanun layihəsi artıq hazırdır: "Sənəd 2017-ci ildə təqdim olunsa da, o zaman onun müzakirəsi və qəbulu dayandırılıb".