Məmmədağa İbrahimovun işçiləri vaxtlı-vaxtında tibbi müayinədən keçmirlər Paytaxtda fəaliyyət göstərən bazarların sayı çoxalmaqdadır. Lakin əksəriyyətinin fəaliyyətində ciddi nöqsanlar mövcuddur. Belə bazarlardan biri də "Təzə bazar" MMC-dir. Sözügedən bazarla bağlı redaksiyamıza tez-tez şikayət məktubları daxil olmaqdadır. Bu bazarda alıcılar satıcılar tərəfindən aldadılır. Xüsusilə də məhsulun çəkisində, keyfiyyətində alıcılara qarşı ədalətsizlik edirlər. Düzdür, digər bazarlarla müqayisədə burada istənilən məhsulu əldə etmək mümkündür. Lakin bazarda satılan məhsulların qiyməti od tutub yanır. Satılan məhsulların keyfiyyəti də alıcıları narazı salan məsələlərdən biridir. Qeyd edək ki, "Təzə Bazar" Məhdud Məsuliyyətli Cəmiyyətinin (MMC) sədri Məmmədağa İbrahimovdur. Bu şəxs "Təzə bazar" MMC-ni öz qanunları əsasında idarə edir. Artıq bu şəxsin qanunsuz əməlləri sahibkarları bezdirib. Məmmədağa İbrahimov ölkədəki mövcud qanunların əksinə olan işlər həyata keçirməkdədir. Artıq bu şəxsin əlindən bazarda sahibkar qalmayıb. İbrahimovun qanunsuz əməllərinə tab gətirə bilməyənlər bazarla əlaqəsini kəsərək başqa bazarlara üz tuturlar. Bundan başqa "Təzə bazar" MMC-də çalışanların sağlamlığı da sual altındadır. Sözügedən bazarda çalışanların vaxtlı-vaxtında tibbi müayinədən keçməsi də şübhə altındadır. Bizə verilən məlumatlara görə orada çalışan satıcılar vaxtlı-vaxtında tibbi müayinədən keçmirlər. Üstəlik, onların satdığı ət məhsullarının bir çoxu ya köhnə olur, ya da dana əti altında camış və başqa ət satırlar. Əlbəttə, hər hansı yerdə lazımi nəzarət olmayanda nəinki orda keyfiyyətsiz ət satılacaq, hətta mənşəyi bilinməyən ətləri də bu cür yerlərdə satmaq istəyənlər daha da çox olacaq. Ət satışında yaranmış özbaşınalıq lap həddini aşıb. Görəsən, bazarda hər gün ət satışına nəzarət edən, onu laboratoriya analizindən keçirən və möhür vurub icazə verən baytar həkim hara baxır? Hər kəsə bəllidir ki, bu gün baytar həkimlər əti müayinədən keçirəndə bir sıra yollara əl atırlar. Belə ki, sahibkarlar baytar həkimlərə şirinlik verəndən sonra heç laboratoriya analizindən keçirmədən ətin sağlam olduğunu sübut edən möhür vurulur. Təəssüf ki, bu gün "Təzə bazar" MMC-də bu hal yaşanır. Hər gün bazara daxil olan əti bu formada laboratoriya analizindən keçirirlər. Etibarlı mənbənin verdiyi məlumata görə, "Təzə bazar" MMC sahibi vergidən yayınır. Orada çalışan fiziki və hüquqi şəxslər qeydiyyata alınmırlar və dövlətə lazımi vergini ödəmirlər. Bu isə dövlətin büdcəsinə nə qədər ziyan vurur. Hətta verilən məlumatlara görə, sözügedən bazarda antisanitariya vəziyyəti hökm sürür. Təəssüf ki, "Təzə bazar" MMC rəhbəri bu mənzərəyə göz yumur. Rəhbərlik bazarın səliqə-sahmanına, təmizliyinə əhəmiyyət vermir. Bu da bazara gələn müştərilərin xoşuna gəlmir. Hətta elə müştəri var ki, bazarda bu cür mənzərəinin şahidi olduqdan sonra bir daha sözügedən ticarət obyektinə ayaq basmır. Hətta "Təzə bazar" MMC-də ov quşlarının qanunsuz satışına münbit şərait yaradılıb. Və bununla da o, ümummilli lider Heydər Əliyevin 1999-cu il 4 iyun tarixli sərəncamı ilə qəbul olunmuş "Heyvanlar aləmi haqqında" Qanunun, eləcə də "Xüsusi mühafizə olunan təbiət əraziləri və obyektləri haqqında", "Ətraf mühitin mühafizəsi haqqında", "Ovçuluq haqqında" qanunların, Azərbaycanın da qoşulduğu BMT-nin "Bioloji müxtəliflik haqqında" konvensiyasının, "Avropanın canlı təbiətinin və təbii mühitinin qorunması haqqında" Avropa Konvensiyasının, "Kökünün kəsilməsi təhlükəsi olan vəhşi fauna və yabanı flora növlərinin beynəlxalq ticarəti haqqında" konvensiyanın tələblərini kobud surətdə pozur.
