Ana Sayfa > Xəbər > “Qarabağ”a bağışlanan stadion niyə kluba verilməyib?

“Qarabağ”a bağışlanan stadion niyə kluba verilməyib?


7-08-2015, 15:47. Yazar: admin
“Qarabağ”a bağışlanan stadion niyə kluba verilməyib?
“Qarabağ”ın Çempionlar Liqasının 3-cü təsnifat mərhələsində Şotlandiyanın “Seltik” klubuna məğlub olması həm azarkeşlər, həm də idman ictimaiyyəti arasında birmənalı qarşılanmayıb. Rəqibin Avropa təcrübəsini nəzərə alaraq Qurban Qurbanovun komandasına haqq qazandıranlar olsa da, “Qarabağ”ı heç vaxt bu qədər zəif görmədiklərini ifadə edənlər də var idi.

"Qafqazinfo" xəbər verir ki, ötən il qrup mərhələsinə vəsiqə qazanan ağdamlıların bu uğuru ölkədə əsl bayrama çevrilmişdi. Elə ölkə rəhbəri İlham Əliyev də komandamızın bu uğuruna biganə qalmayıb onlarla görüşüb təbriklərini çatdırmışdı.

Həmin görüşdə “Qarabağ”a 1 milyon manat mükafat verən prezident Suraxanı qəsəbəsində yerləşən Tofiq İsmayılov adına stadionun ərazisini də hədiyyə etmişdi. Prezident həmin ərazinin “Qarabağ” klubunun balansına keçirilməsi ilə bağlı tapşırıq versə də, məlum olub ki, hadisədən bir il keçməsinə baxmayaraq həmin ərazi hələ də Dövlət Neft Şirkətinin balansındadır.

Düzdür, Ağdam klubu bu ərazidə özü üçün yeni baza inşa edib. Amma bildiyimiz kimi, bu ərazi elə əvvəldən olduğu kimi “Qarabağ”a icarəyə verilib və klub da bazanın tikintisinə bir neçə il əvvəl başlayıb. Stadion və baza yaradan klub dövlət başçısı İlham Əliyevin onlara verdiyi torpaqda isə uşaq akademiyası tikmək istəyirdilər, lakin klubun istəyi hələ ki, reallaşmayıb.

Elə saytımıza açıqlama verən klubun icraçı direktoru Əmrah Çəlikəl də "Qafqazinfo"ya açıqlamasında bunu təsdiqləyib: “Düzdür, cənab prezident keçən il komandamızla görüşdə Suraxanı qəsəbə stadionunun ərazisinin “Qarabağ”a verilməsi haqda tapşırıq vermişdi. Amma ərazi hələ də klubumuzun balansına keçirilməyib. Bilirəm ki, hamı deyəcək ki, “Qarabağ” orda baza yaradıb. Amma ora icarə əsasında bizə məxsusdur. Yəni icarəyə götürdük və komandamız üçün şərait yaratdıq. Əsas komanda üçün hər şərait yaradılıb və işlər başa çatmaq üzrədir. Lakin biz ölkə rəhbərinə müraciətimizdə orda uşaq akademiyası yaratmaq istədiyimizi bildirmişdik. Ərazi isə hələ də bizim balansımıza verilməyib. Ona görə də biz aşağı yaş qruplarından ibarət komandalarımız üçün Tofiq Bəhramov adına Respublika stadionunda şərait yaratmışıq. Onlar məhz orada məşq edirlər. İnanıram ki, yaxın günlərdə ərazinin bizə verilməsi məsələsi yekunlaşacaq və biz də akademiya inşa edəcəyik”.

Məsələyə aydınlıq gətirmək üçün sözügedən əraziyə baş çəkdik. Məlum oldu ki, həmin ərazinin bir hissəsində “Neftçi İdman Klubu”nun idmançılarının məşq etməsi üçün şərait yaradılıb. Orada bir çox idman növləri üçün xüsusi zallar var. Bu barədə məlumatı “Neftçi İdman Klubu”nun İctimai Birliyinin mətbuat xidmətindən dəqiqləşdirdik: “Bu ərazi SOCAR-ın balansındadır. Oranın 80 faizi “Qarabağ” futbol klubuna arendaya verilib. 10 faiz hissəsində isə idman zalları var. Atıcılıq, qılıncoynatma, güləş, cüdo, mini-futbol üçün idman zalları fəaliyyət göstərir. “Neftçi İdman Klubu”nun idmançıları da burada icarə əsasında məşq edir. Digər 10 faizində isə SOCAR-ın muzeyi yerləşir”.

Fotolardan da gördüyünüz kimi, “Qarabağ”a verilməli olan ərazinin bir hissəsində idman zalları yerləşir. Elə qapısında kağız üzərində “Yunan-roma güləşi” yazılıb. Həmin ərazidə ən çox diqqət çəkən isə kiçik meydançalar idi. Yəqin, bu kiçik süni örtüklü stadionlar 10 il bundan öncə inşa edilib. Amma həmin stadionlarda böyük ehtimalla heç bir komanda məşq etmir və yəqin ki, heç kim də mini-futbol oynamır.

Diqqətçəkən məqam isə o oldu ki, idman zallarına giriş qapısında “Neftçi”nin loqosuna rast gəldik. Və bu loqonun uzun müddətdir ki, orada olduğunu müəyyənləşdirmək çətin deyildi.

Beləliklə, ölkə başçısının tapşırıq verməsinə baxmayaraq “Qarabağ”ın niyə hələ də icarə əsasında Tofiq İsmayılov adına stadionda istifadə etdiyi müəmma olaraq qalır...

Geri dön