Ermənistanla sərhəddə nəzarət-buraxılış məntəqəsinin yeni binası istifadəyə verilib - FOTO
20-12-2021, 15:52. Yazar: admin
Azərbaycan-Ermənistan sərhədində, Qafan-Gorus magistral yolunda dövlət sərhədindən nəzarət-buraxılış məntəqəsinin yeni binası istifadəyə verilib.
APA-nın Qarabağ bürosunun xəbərinə görə, Qubadlı rayonunun Eyvazlı kəndi ərazisində yaradılmış məntəqədə istifadəyə verilən bina DSX-nin, Dövlət Gömrük Komitəsinin əməkdaşlarının birgə fəaliyyətinin yüksək səviyyədə təmin olunmasına imkan verir.
DSX Mətbuat mərkəzinin əməkdaşı, polkovnik-leytenant Rəşad Məşədiyev bildirib ki, burada dövlət sərhədindən keçən şəxslərin, nəqliyyat vasitələrinin və yüklərin müvafiq qaydada rəsmiləşdirilməsi, mərkəzləşdirilmiş elektron qeydiyyat sisteminə daxil edilməsi və digər sərhəd nəzarəti tədbirləri həyata keçirilir. Bu ərazinin mühafizəsi sərhəd döyüş məntəqələri tərəfindən yerinə yetirilir.
Qeyd olunub ki, Eyvazlı sərhəd-nəzarət postunun yeni binasında hərbçilər, gömrükçülər üçün hər cür şərait yaradılıb. Eyvazlı sərhəd-nəzarət postunda dövlət sərhədindən keçən şəxslərin və avtomobillərin qeydiyyatı aparılacaq.
Geri dön