Gədəbəyli sahibkar prezidentdən kömək istəyir...
11-04-2015, 11:45. Yazar: admin
Artıq neçə müddətdir ki, qəzetimizi səhifələrində Gədəbəy Rayon İcra Hakimiyyətinin başçısı Ramiz Yediyarov tərəfindən əmlakı dağıdılaraq külli-miqdarda maddi ziyana məruz qoyulmuş daha bir sahibkar, Əliyev Oktay Qara oğlu tərəfindən təqdim olunan məlumatlar əsasında materiallar dəc olunur. Bu günlərdə redaksiyamıza daxil olmuş növbəti məktubda təqdim olunan faktlar isə, Oktay Qara oğlunun başına rayon rəhbərliyi tərəfindən gətirilən oyunlarla uzlaşdığı kimi, Ramiz Yediyarovun qeyri-qanuni əməllərini ifşa edən daha bir sübut kimi də çıxış edir. Redaksiyamıza müraciət etmiş Gədəbəy şəhər sakini Əliyeva Aybəniz Ramazan qızı öz məktubunda Oktay Qara oğlunun və onun kimi Gədəbəy şəhərindəki yeni açılmış Ticarət Mərkəzinə zorla yerləşdirilən digər sahibkarların da üzləşdikləri problemin kökündə, ilk növbədə onun həyat yoldaşı Vaqif Səfərova qarşı törədilmiş hüquq pozuntusunun durduğunu bildirir.
Məktubda deyilir: “Hörmətli redaksiya, mən sizin qəzetinizin daimi oxucusuyam. Sizin qəzetin 7 aprel 2015-ci il tarixli buraxılışında Əliyev Oktay Qara oğlunun təqdim etdiyi məlumatlar əsasında hazırlanmış yazını da oxudum. Məqalədə yazılır ki, Əliyev Oktay Qara oğluna məxsus olan mağaza dağıdılandan sonra, ona Ramiz Yediyarova məxsus ticarət mərkəzində yer təklif edilmişdir. Mənə belə gəlir ki, siz o cümləni belə yazmalı idiniz: “Azərbaycan Respublikası Gədəbəy Rayon İcra Hakimiyyətinin Başçısının 16 iyun 1998-ci il 143 №-li sərəncamı ilə Səfərov Vaqif Qara oğlunun adına verilmiş və Ramiz Yediyarov tərəfindən heç bir əsası olmadan əlindən alınmış torpaq sahəsində tikilmiş ticarət mərkəzində yer təklif olunmuşdur. Çünki o torpaq sahəsi 17 il bundan əvvəl Səfərov Vaqif Qara oğluna verilərkən, cənab Ramiz Yediyarovun hansı vəzifədə çalışdığını siz daha yaxşı bilərsiniz...” Bundan sonra Aybəniz xanım Oktay Qara oğlunun həmin ticarət mərkəzinə köçməkdən imtina etməsini təqdir edərək, digər sahibkarlara da bu cür qərar verməyi tövsiyyə edir. Təbii ki, ən azından başqasına məxsus torpaq üzərində halallıq verilmədən inşa olunmuş ticarət mərkəzində olunacaq alış-verişin heç bir xeyir-bərəkəti də olmaz. Torpağın digərinə məxsus olması və halallıq verilmədən zəbt edilməsi isə qətiyyən şübhə doğurmayan bir faktdır: “Oktay Qara oğlu o ticarət mərkəzinə getməməkdə çox düzgün qərar vermişdir. Bütün gədəbəylilər bilir ki, o ərazi Vaqif Səfərova məxsusdur. O ticarət mərkəzində yer alan şəxslər də bilməlidir ki, bir torpaq iki nəfərin adına sənədləşə bilməz. Bu cinayətdir. Hələlik biz bunu cənab Ramiz Yediyarova və onun əlaltılarına sübut edə bilmirik...” Xatırlayırsınızsa, ötən materialda biz əmlakı dağıdılmış sahibkar Oktay Qara oğlunun düşdüyü durumdan dolayı hətta intihar etmək barədə düşündüyünü də vurğulamışdıq. Diqqətəlayiq haldır ki, özlərinin yaşadıqları maddi sıxıntılar və Ramiz Yediyarovun özbaşınalıqlarından dolayı yaranmış problemlər əhatəsində belə, Aybəniz xanım digərlərini ruhən dəstəkləməyə cəhd göstərir. Məktubunun sonunda Aybəniz Əliyeva yazır: “O ki, qaldı Oktay Qara oğlunun intihar məsələsinə, bu heç də çıxış yolu deyil. Rəhmətlik Əli Abdullayevin ölümü də bu səbəbdən baş vermişdi. Amma onun ailəsi bunu sübut edə bilmədilər. Kimin əlindən min bir əzab əziyyətlə qurub-yaratdığını alsalar, bir günün içində gözü önündə bütün mülkünü vurub dağıtsalar eyni vəziyyətə düşər. Biz ancaq ümidimizi bu dövlətin rəhbərinə bağlamalıyıq. Mənim həyat yoldaşım Vaqif Səfərovun da əlindən 26 sot torpaq sahəsini aldılar və içərisində tikdiyimiz obyekti yağı malı kimi dağıtdılar. Biz də haqqın, ədalətin nə zaman yerini tutacağını və Ramiz Yediyarovun tutduğu qanunsuz əməllərinə görə cavab verəcəyi günü gözləyirik.”
Geri dön