Azərbaycanda mobil və sabit internetin sürəti artıb
16-09-2020, 11:18. Yazar: admin
Bu ilin avqust ayında Azərbaycanın mobil rabitə operatorlarının şəbəkələrində giriş internet trafikin sürəti 32,99 Mbit/s-ə təşkil edib.
"APA-Economics" "Ookla"nın "Speedtest Global Index"inə istinadən verdiyi məlumata görə, bu göstərici iyul ayı ilə müqayisədə 6,4% artıb.
Avqustda ölkənin mobil şəbəkələrində çıxış trafikinin sürəti iyul ayının göstəricisi ilə müqayisədə 7,6% artaraq 14,85 Mbit/s olub.
Qeyd edək ki, dünya üzrə giriş və çıxış mobil trafikinin sürəti isə müvafiq olaraq 34,82 Mbit/s və 10,99 Mbit/s təşkil edib.
Avqust ayının nəticələrinə görə Azərbaycan bu göstərici üzrə dünya ölkələri sırasında 4 pillə irəliləyərək 60-cı yerdə qərarlaşıb. Mobil internet sürətinə görə liderlərin ilk üçlüyünə Cənubi Koreya (113,01 Mbit/s), Çin (111,26 Mbit/s) və BƏƏ (111,13 Mbit/s) daxil olub.
Reytinqə əsasən, avqust ayında Azərbaycanda stasionar genişzolaqlı internet trafikinin giriş sürəti 22,29 Mbit/s, çıxış sürəti isə 23,48 Mbit/s təşkil edib. Bu göstəricilər iyul ayı ilə müqayisədə müvafiq olaraq 5 və 2,6% artıb.
Dünya ölkələri üzrə sabit internetin sürəti reytinqində Azərbaycan avqust ayının yekunlarına görə 3 pillə irəliləyərək 111-ci yerdə qərarlaşıb.
Dünyada ən sürətli sabit interneti olan ilk üç lider ölkəsi Sinqapur (218,07 Mbit/s), Honkonq (205,69 Mbit/s) və Rumıniya (175,39 Mbit/s) olub. Sabit internetin giriş və çıxış trafikinin qlobal orta sürəti isə müvafiq olaraq 84,33 Mbit/s və 44,10 Mbit/s olub.
Geri dön