Baş Prokurorluq və BDU arasında əməkdaşlığa dair müqavilə imzalandı
5-04-2021, 15:04. Yazar: admin
Azərbaycan Respublikası Baş Prokurorluğu və Bakı Dövlət Universiteti (BDU) arasında əməkdaşlığa dair müqavilə imzalanıb.
Bu barədə "Report"a Baş Prokurorluğun Mətbuat xidmətindən məlumat verilib.
Bildirilib ki, Azərbaycan Prokurorluğu orqanları ilə ölkənin aparıcı ali təhsil müəssisələri arasında fəal əməkdaşlıq əlaqələrinın daha da inkişaf etdirilməsi, peşə hazırlığı və tədrisin təşkili sahəsində qarşılıqlı faydalı əməkdaşlığın genişləndirilməsi istiqamətində mühüm və ardıcıl tədbirlər davam etdirilir.
Həmin tədbirlərin davamı olaraq, 5 aprel 2021-ci il tarixdə Bakı Dövlət Universitetinin rektoru Elçin Babayevin rəhbərlik etdiyi nümayəndə heyəti Baş Prokurorluğun Elm-Tədris Mərkəzində olunub.
İlkin olaraq qonaqlar Baş Prokurorluğun yeni istifadəyə verilən inzibati binalar kompleksi, o cümlədən Vətən müharibəsinə həsr olunmuş tarixi-memorial qalereya, mühazirə, praktiki məşğələlər və iclas zalları, kitabxana, kriminalistika və istintaq otaqları ilə tanış olublar.
Tədbir çərçivəsində rektor Elçin Babayevlə Baş prokurorun müavini Elmar Camalovun arasında görüş keçirilib, görüşdə BDU-nun Hüquq fakültəsinin dekanı Əmir Əliyev, Baş Prokurorluğun Elm-Tədris Mərkəzinin rəisi Mübariz Əhmədov, Mətbuat xidmətinin rəhbəri Günay Səlimzadə, Elm-Tədris Mərkəzinin şöbə rəisi Ramin Camalov, böyük prokuroru Nigar Qələndərli iştirak ediblər.
Görüşdə iki qurum üçün olduqca faydalı olan qarşılıqlı əməkdaşlıq istiqamətləri müzakirə edilmiş, gənc hüquqşünasların peşə hazırlığının təşkil edilməsi istiqamətində səylərin birləşdirilməsi qərara alınıb.
Azərbaycan Baş prokuroru yanında məşvərətçi orqan olan Elmi-Məsləhət Şurasının fəaliyyətində BDU nümayəndəsinin səmərəli fəaliyyəti xüsusi olaraq qeyd edilib.
Görüşün nəticələrinə uyğun olaraq, Baş Prokurorluq və BDU arasında əməkdaşlığa dair müqavilə imzalanıb.
Müqavilə birgə elmi konfransların, dəyirmi masaların və görüşlərin keçirilməsi, elmi məqalələrin, vəsaitlərin və mətbu nəşrlərin hazırlanması, hüquq tətbiqi fəaliyyətdə daha çox rast gəlinən problemlərin həlli məqsədilə birgə elmi-praktiki araşdırmaların aparılması və sair məsələlər üzrə geniş və səmərəli əməkdaşlığı əhatə edir.
"Baş Prokurorluqla Bakı Dövlət Universiteti arasında imzalanan müqavilə gənc hüquqşünasların hazırlanmasına da mühüm töhfə verəcəkdir", - Mətbuat xidmətindən bildirilib.
Geri dön