Tərtərdə uşaq bağçası istifadəyə verilib
Tarix: 25-12-2018, 07:12 | Çap et
Tərtərdə uşaq bağçası istifadəyə verilib
Tərtər şəhər 4 nömrəli körpələr evi-uşaq bağçası üçün yeni inşa olunan bina istifadəyə verilib.

Bu münasibətlə keçirilən tədbirdə çıxış edən Tərtər Rayon İcra Hakimiyyətinin başçısı Müstəqim Məmmədov uşaqları, onların valideynlərini, bağça kollektivini təbrik edib, uşaqlara gələcək həyatda müvəffəqiyyətlər və ölkəmiz üçün layiqli övlad olmalarını arzulayıb.

Bildirilib ki, uşaqların keyfiyyətli təhsil alması və hərtərəfli qayğı ilə əhatə olunması, onlar üçün zəruri şəraitin yaradılması, böyüməkdə olan nəslin layiqli vətəndaş kimi formalaşması Azərbaycanda dövlət uşaq siyasətinin başlıca prinsiplərindəndir. Ölkəmizin hər yerində körpələr evləri, uşaq bağçaları, internat və orta məktəblər tikilir və əsaslı şəkildə yenidən qurulur. Tərtərdə bu gün açılışı olan körpələr evi-uşaq bağçası bu sahəyə dövlətin diqqət və qayğısının bariz nümunəsidir.

Diqqətə çatdırılıb ki, son illərdə Tərtər şəhər 4 nömrəli, "Nərgizim", Şıxarx qəsəbə uşaq bağçaları üçün yeni binalar inşa edilib, 2 nömrəli, Seydimli, Güləbatlı, Sarıcalı kənd uşaq bağçaları əsaslı təmir edilib. 2019-cu ildə Yuxarı Sarıcalı kənd uşaq bağçasının da əsaslı təmir olunması nəzərdə tutulur.

Azərbaycan Respublikası Ərazilərinin Bərpası və Yenidən Qurulması üzrə Agentliyin bölgələr üzrə layihə rəhbəri Vəli Albəndov Agentlik tərəfində həyata keçirilən layihələr haqqında məlumat verib, uşaqları bağçanın açılışı münasibətilə təbrik edib, onlara firavan gələcək və şən həyat arzulayıb.

Tədbirdə çıxış edən ictimaiyyət nümayəndələri və valideynlər göstərilən qayğıya görə dövlətimizin başçısına və bağçanın tikintisində əməyi olanlara minnətdarlıqlarını bildiriblər.

Çıxışlardan sonra tədbir iştirakçıları uşaq bağçasında yaradılan şəraitlə tanış olublar. Azərbaycan Respublikası Ərazilərinin Bərpası və Yenidən Qurulması üzrə Agentliyin sifarişi əsasında inşa olunan 100 yerlik uşaq bağçasında uşaqların təlim-tərbiyəsi, ilk yaşlarından intellektual, fiziki və əqli inkişafı, istedad və qabiliyyətlərinin üzə çıxarılması, sağlamlıqlarının qorunması üçün hər cür şərait yaradılıb. İkimərtəbəli binada yataq, oyun, tibb, məşğələ, yemək, geyinib-soyunma, tərbiyəçi-metodist otaqları, musiqi və idman zalları, mətbəx, anbarlar yaradılıb, bağça lazımi inventar və avadanlıqlarla, istilik və müşahidə sistemləri ilə təmin olunub. Bağçanın həyətində abadlıq işləri aparılıb, nasos stansiyası, qazanxana, yanğın əleyhinə və içməli su anbarları, oyun meydançası 2 söhbətgah tikilib.





Xəbərlər
07-03-2024 12:06
 
 
 
 
 
 
 
 
 
 
 
 
 
 
 
 
 
 
 
 
 
 

Vertikal.az © 2015
Məlumat internet səhifələrində istifadə edildikdə müvafiq keçidin qoyulması mütləqdir.
E-mail : [email protected]
Designed by Daraaz.net