Tofiq Yaqublu REAL-la Milli Şuranın davasından danışdı
Tarix: 5-09-2019, 08:16 | Çap et
Tofiq Yaqublu REAL-la Milli Şuranın davasından danışdı
“İnsanlar bu məsələyə çox naşı yanaşırlar. Bir yerdə iddialı, ambisiyalı, mübariz insanlar toplaşırsa, sözsüz ki, fikir ayrılığı olacaq. Belə olan halda qütbləşmə, haçalanma yaranır. Bu da normal haldır”.

Bunu “Qafqazinfo”ya açıqlamasında Müsavat Partiyasının fəalı Tofiq Yaqublu son günlər Milli Şura üzvləri ilə REAL Partiyası arasında yaranan qalmaqala münasibət bildirərkən deyib.

T. Yaqublu dünyanın hər yerində prosesin bu cür olduğunu diqqətə çatdırıb: “Elə bir yer yoxdur ki, orada müxalifət qüvvələrinin hamısı eyni düşünsün. Hərə öz fikrini, mövqeyini paylaşır, digəri özünün haqlı olduğunu sübut etməyə çalışır. Əslində belə şeylər olmasa, müxalifətin, fikrin yoxluğu mənzərəsi yarana bilər. İstənilən məsələylə bağlı taktiki fikirlər, yanılmalar ola bilər. Əgər belə olmasaydı, normal olmazdı.

Çünki qalmaqalsız keçinmək mümkün deyil. Hamı istənilən halda eyni cür düşünə bilməz. Bir partiyanın daxilində də adi bir məsələylə ilə bağlı müxtəlif yanaşmalar olur. Bu niyə hakimiyyətin xeyrinə işləsin ki? Bu qüvvələrin hamısı ayrı-ayrılıqda deyir ki, hakimiyyət legitim deyil. Bu məsələdə fikir ayrılığı yoxdur. Bunu deyib də öz aralarında mübahisə yaradırlarsa, olsun, daha neyləmək olar? Mixail Saakaşvili hakimiyyətə gələn il Gürcüstanda parlament seçkilərində 52 partiya iştirak edirdi. Palaz boyda bülleten, o boyda da fikir ayrılığı var idi. Partiyalar bir-birlərini qəbul etmirdilər, ancaq əksəriyyəti Şevardnadze hakimiyyətinə qarşı idi. Ancaq sonda demokratiya qalib gəldi”.

Müsavat fəalı vurğulayıb ki, partiyaların hər biri özünün daha çox elektorat tərəfindən sevildiyini, müdafiə edildiyini düşünür. Ancaq bunu ədalətli seçkilər göstərər. Həmçinin ictimai rəydə bunu görüb müəyyənləşdirmək olar. Heç kim sübut edə bilməz ki, o daha güclüdür. Ancaq kənardan bunu görmək mümkündür. Mən hazırda ad çəkmək istəmirəm. Bu prosesi ən yaxşı müəyyənləşdirən amil hökumətin bütün resursları ilə kimə, hansı təşkilata qarşı mübarizə aparmasıdır. Deməli, lider, də güclü təşkilat da odur. Bu,aydın məsələdir. Hökumət təhlükənin nə olduğunu, ona problem yaradan qüvvənin kim olduğunu özü hamıdan yaxşı müəyyənləşdirir”.





Xəbərlər
07-03-2024 12:06
 
 
 
 
 
 
 
 
 
 
 
 
 
 
 
 
 
 
 
 
 
 

Vertikal.az © 2015
Məlumat internet səhifələrində istifadə edildikdə müvafiq keçidin qoyulması mütləqdir.
E-mail : [email protected]
Designed by Daraaz.net