“İdeal-İ-İnşaat" MTK-nın sədri Baş Prokurorluğa çağrılıb?
Tarix: 16-07-2015, 10:54 | Çap et
“İdeal-İ-İnşaat" MTK-nın sədri Baş Prokurorluğa çağrılıb?
Neçə gün əvvəl DİN-nin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən saxlanılan İsa Məmmədovun Baş Prokuror Yanında Korrupsiyaya Qarşı Mübarizə İdarəsinə şağırılması barədə xəbər var...
Xəbər verildiyi kimi, iyulun 7-də "İdeal-İ-İnşaat" MMC-nin direktoru İsa Məmmədov və onun yaxın qohumu və şəriki Məmmədov Çingiz Əkbər oğlunun DİN-nin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən saxlanılması barədə məlumat daxil olmuşdu. Sonradan məlum oldu ki, fakt doğrudur. Sən demə, İsa Məmmədovun rəhbəri olduğu MMC 10 ilə yaxındır sifarişçi "Baku Qrup" adlı MMC ilə bağladığı müqavilə şərtlərini yerinə yetirmir, sifarişçinin xəbəri olmadan Bakı şəhəri, Xocalı prospekti k. 29 ünvanında (keçmiş Şüşə zavodunun ərazisi) yerləşən yaşayış binasındakı mənzilləri satıb pulunu mənimsəyir. Mənzillərinə köçə bilməyən vətəndaşların İsa və Çingiz Məmmədovların qanunsuz əməlləri ilə bağlı Prezident İlham Əliyevə, Baş Prokuror Zakir Qaralova, milli təhlükəsizlik naziri Eldar Mahmudova ünvanlı şikayət ərizəsi bir daha təsdiqləyirdi ki, İsa Məmmədov nə işlə məşğuldur. Şikayətçilər yazırdılar: "Biz- Bakı şəhəri, Xocalı prospekti k.29 ünvanında (keçmiş Şüşə zavodunun yerləşdiyi ərazidə) "İdeal-İ İnşaat" MMC-nin tikdiyi yaşayış binasından mənzil almaq üçün bundan təqribən 10 il əvvəl bu MMC ilə müqavilə bağlamışıq və mənzil tikintisinə görə bu MMC-yə mənzilimizin dəyərinı tam ödəmişik. Lakin "İdeal-İ İnşaat" MMC-nin təsisçisi və əvvəlki direktoru Məmmədov İsa Əli oğlu artıq 8 ilə yaxındır ki, bizim binamızı tikib bizə təhvil vermir. Dəfələrlə mənzilimizin nə zaman bizə təhvil verilməsi ilə əlaqədar İsa Məmmədovla əlaqə saxlamaq istəmişik. Məlum olmuşdur ki, İsa Məmmədov məsuliyyətdən yayınmaq üçün formal olaraq "direktorluqdan çıxaraq" özünün "İdeal-İ İnşaat" MMC-sinə yaxın qohumu Məmmədov Çingiz Əkbər oğlunu "direktor" təyin etmişdir. Bu qohumlar isə birləşərək, bizim mənzil tikintisinə görə onlara verdiklərimiz pulları öz keflərinə xərcləyirlər, yaşayış binasını isə heç vaxt tikib qurtarmaq niyyətində deyillər.
Bizə verilən məlumata görə keçmiş Şüşə zavodunun olduğu bu ərazidə tikilən binalarımızın yerləşdiyi torpaq sahəsi "Baku Qrup" adlı MMC-yə məxsusdur, lakin binaların tikintisi isə, "Baku Qrup"la bağlanmış podrat müqaviləsi əsasında İsa Məmmədov və onun "İdeal-İ İnşaat" MMC-si tərəfindən tikilir və bizim mənzil tikintisinə dair müqavilələrimiz də həmin bu "İdeal-İ İnşaat" MMC ilə bağlanmışdır.
Mənzillərimizin pullarını da biz bu "İdeal-İ İnşaat" MMC-yə vermişik. "İdeal-İ İnşaat" MMC-nin müdriyyəti isə hər dəfə bizə yalançı vədlər verərək binaları tikib qurtarmır. Bizə verilən məlumatlara görə böyük ehtimal var ki, İsa Məmədov və onun qohumları bizim mənzillərimizi bir neçə dəfə digər vətəndaşlara da sataraq onlardan aldıqları pulları da öz şəxsi keflərinə və uşaqlarının adlarına obyektlər almağa xərcləmişlər.
Hazırkı şikayət məktubumuzla biz, halal zəhmətlə qazandığımız pullar İsa Məmədov və onun qohumları tərəfindən dələduzluq yolu ilə aldadılaraq əlindən alınmış vətəndaşlar, "Təzadlar" qəzeti vasitəsilə xahiş edirik ki, bu məsələni araşdırmaqda bizə köməklik göstərilsin. İsa Məmmədov və onun "İdeal-İ İnşaat" MMC-si barəsində bu binalardan mənzillər almış və bununla da bizim kimi aldadılmış digər vətəndaşları da qəzetdə bu haqda yazılar dərc etməklə ayıltmaq lazımdır. Çünki sonra gec olacaq. Məktubumuzun surətlərinin ünvanlandığı digər hüqüq mühafizə orqanlarından isə xahiş edirik ki, bizi aldadaraq pullarımızı mənimsəyən İsa Məmmədov, onun qohumları və "İdeal-İ İnşaat" MMC-nin digər məsul işçiləri barədəsində lazımi tədbirlər görərək onların cəzalandırılması üçün zəruri addımlar atılsın.
Hörmətlə,
Şikayətçılər:
Hüseynova Ülviyyə, Abdullayeva Gülarə, Şirəliyeva Firəngiz, Uğurluyev Salman, Rəhimova Aygün, Mirzəzadə Dilşad, Həsənov Rüstəm, Novruzova Sədəf və başqaları".
***
Nəhayət, bu gün məlumat aldıq ki, İsa Məmmədov Baş Prokuror Yanında Korrupsiyaya Qarşı Mübarizə İdarəsinə şağrılıb. Bunu İsa Məmmədova yaxın şəxslərdən biri əməkdaşımızla söhbətində bildirib. Onun adı çəkilən idarədə hansı suallara cavab verməsi hələki tam aydın olmasa da bu istiqamətdə dəqiqləşdirmələrimiz davam edir. Maraqlı məlumatlar əldə edilib. Bizi izləyin.
"Təzadlar"





Xəbərlər
 
 
 
 
 
 
 
 
 
 
 
 
 
 
 
 
 
 
 
 
 

Vertikal.az © 2015
Məlumat internet səhifələrində istifadə edildikdə müvafiq keçidin qoyulması mütləqdir.
E-mail : [email protected]
Designed by Daraaz.net